Hacıqabul rayonunun ərazisində palçıq vulkanının püskürməsi qeydə alınıb
30 yanvar 2026-cı il tarixində yerli vaxtla saat 16:53-də Hacıqabul rayonunda Durandağ palçıq vulkanının növbəti püskürməsi qeydə alınıb.
Palçıq vulkanının püskürməsi AMEA nəzdində RSXM-nin vulkanətrafı seysmik stansiyaları tərəfindən qeydə alınıb. RSXM-nin “Zəlzələ ocaqlarının dinamikası” şöbəsinin məlumatına əsasən, palçıq vulkanının püskürməsi 13 dəqiqə davam edib, bir faza ilə xarakterizə olunub. Püskürmənin dərinliyi 3 kilometr, püskürmə nəticəsində ayrılan enerji 3.38×10^6 coul olub.
Püskürmə yerli vaxtla saat 11:45-də zəif titrəyişlərlərlə başlamış, saat 16:53-də güclü partlayışla davam etmişdir. Qaz yanması və alov sütunu 300-350 metr hündürlüyə qalxması və brekçiyanın vaxtaşırı tullanması ilə müşaiyət olunmuşdur. Püskürmə prosesi 13 dəqiqə davam etsə də, alovun yanması hələki davam edir.
Qeyd edək ki, vulkanın ilk püskürməsi 1960-cı il 18 iyunda baş vermişdir. Sonrakılar 1968, 1986, 2001 və 2004-cü ildə olmuşdur. Vulkanın hündürlüyü 302 metrdir və ətraf yerlərdən 200 metr yüksəlir.

