RSXM-də mərkəzin futbol komandasının üzvləri, eləcə də gənc tədqiqatçıların beynəlxalq konfransının qalibi olan əməkdaşlarla görüş keçirilib

Mayın 27-də AMEA nəzdində Respublika Seysmoloji Xidmət Mərkəzində  AMEA-nın Azad Həmkarlar İttifaqının (AHİ) və AMEA-nın Gənc Alim və Mütəxəssislər Şurasının təşkilatçılığı ilə AMEA-nın elmi müəssisə və təşkilatlarının komandalarının Ulu Öndər Heydər Əliyevin anadan olmasının 101-ci ildönümünə həsr olunmuş  futbol yarışının qalibi olan RSXM-nin futbol komandasının üzvləri ilə görüş keçirilib. RSXM-nin baş direktoru, AMEA-nın müxbir üzvü, professor Qurban Yetirmişli, qazanılmış qələbə münasibəti ilə mərkəz əməkdaşlarını təbrik edərək, RSXM-nin komandasının yoldaşlıq görüşləri də daxil olmaqla bütün oyunlarda rəqib komandaları məğlub edərək, yarışın qalibi olduqlarını bildirib.

Professor Qurban Yetirmişli komanda üzvlərinə göstərdikləri qətiyyətli iradəyə və əldə etdikləri inamlı qələbəyə görə təşəkkür edib. RSXM-nin əməkdaşlarının öz sahələri ilə yanaşı, ölkəmizin mədəni, idman və sosial sahələrdə yaxından iştirak etdiklərini bildirən mərkəzin baş direktoru komanda üzvlərini təltif edərək, onları təbrik edib.

İclasda həmçinin Bakı Ali Neft Məktəbində (BANM) Ümummilli Lider Heydər Əliyevin anadan olmasının 101-ci ildönümünə həsr edilmiş Tələbə və Gənc Tədqiqatçıların V Beynəlxalq Elmi Konfransında iştirak edən RSXM-nin əməkdaşları da təltif olunublar. Qeyd edək ki, mərkəz əməkdaşları tərəfindən konfransa təqdim olunmuş SeisComp proqramı vasitəsilə 2022-ci ildə Lökbatan palçıq vulkanının aktivləşməsinin analizi” məruzəsi (müəlliflər: N.Təhlətli, M.Şıxalıyeva və T. Yusifova) birinci yerin qalibi, “2023-cü il 6 fevral Türkiyə zəlzələsinin və Xəzər dənizinin Azərbaycan hissəsində zəlzələ ocaqlarının aktivləşməsinin analizi” məruzəsi (müəlliflər: N.Təhlətli və G.Əsgərova) məruzəsi isə ikinci yerin qalibi olublar.

RSXM-nin baş direktoru mərkəz əməkdaşlarının məqalələrinin 384 məqalə və tezis sırasında birinci və ikinci yeri tutmasının yüksək qiymətləndirərək, gənc əməkdaşlara bundan sonrakı elmi fəaliyyətlərində də uğurlar arzulayıb.

İclasda həmçinin mərkəzin əməkdaşı Fuad Səlimov 70 illik yubileyi münasibəti ilə təltif olunub.

Sonda xatirə şəkilləri çəkilib.