RSXM-nin futbol komandası rəqibinə 16:0 hesabı ilə qalib gəldi

Aprelin 25-də AMEA-nın Azad Həmkarlar İttifaqının (AHİ) və Gənc Alim və Mütəxəssislər Şurasının təşkilatçılığı ilə Ümummilli lider Heydər Əliyevin anadan olmasının 99 illik yubileyinə həsr edilmiş AMEA-nın gənc alim və mütəxəssislərinin VII institutlararası futbol çempionatının açılışı olub.

Açılış mərasimində AMEA-nın vitse-prezidentləri, akademiklər İsa Həbibbəyli, Dilqəm Tağıyev, AHİ-nin sədri, hüquq elmləri doktoru, professor Habil Qurbanov, Gənc Alim və Mütəxəssislər Şurasının sədri, kimya üzrə fəlsəfə doktoru Elmir Babayev, bir sıra elmi müəssisə və təşkilatların baş direktorları, Həmkarlar Təşkilatlarının sədrləri və gənc alimlər iştirak ediblər. 

Çempionatda akademiyanın 20 elmi müəssisə və təşkilatlarından 19 komanda iştirak edir. 25 aprel - 25 may tarixlərində keçiriləcək oyunlar AFFA-nın hakimi tərəfindən idarə olunacaq.

Qeyd edək ki, ilk qarşılaşma bu gün AMEA nəzdində Respublika Seysmoloji Xidmət Mərkəzi və Dendrologiya İnstitutunun komandaları arasında olub. Görüş seysmoloqların komandasının 16:0 hesabı ilə qalib gəlməsi ilə başa çatıb. 

AMEA nəzdində RSXM-nin İnformasiya şöbəsi