Seysmoloqların komandası finala vəsiqə qazanıb

AMEA-nın Azad Həmkarlar İttifaqının və Gənc Alim və Mütəxəssislər Şurasının təşkilatçılığı ilə Ulu Öndər Heydər Əliyevin anadan olmasının 100 illiyinə həsr olunmuş Spartakiada çərçivəsində keçirilən futbol yarışında AMEA nəzdində Respublika Seysmoloji Xidmət Mərkəzinin futbol komandası final mərhələsinə vəsiqə qazanıb. Yarımfinal oyununda AMEA nəzdində RSXM Elm və Təhsil Nazirliyinin İqtisadiyyat İnstitutu ilə qarşı-qarşıya gəliblər. Qarşılaşma 6:3 hesabı ilə RSXM komandasının qələbəsi ilə başa çatıb. 

Növbəti final mərhələsində AMEA nəzdində Respublika Seysmoloji Xidmət Mərkəzi Azad Həmkarlar İttifaqının komandası ilə qarşılaşacaq. 

Onu da bildirək ki, RSXM əməkdaşları bundan əvvəlki illərdə də ölkəmizdə keçirilən müxtəlif idman növləri üzrə yarışlarda iştirak edərək, yüksək nəticələr göstərib və medallar qazanıb. 2018-ci ildə RSXM-nin futbol komandası AMEA-nın Azad Həmkarlar Təşkilatının təşəbbüsü ilə institut və elmi təşkilatların komandalarının yarışdığı II Spartakiadanın qalibi olub.

Qeyd edək ki, bu il futbol, stolüstü tennis və şahmat (qadın və kişilər arasında) yarışlarına ümumilikdə 15 müəssisə qatılıb.